हो परेवाहरु लुतो कन्याइँरहन्छन्
नाङ्गा जनताका आङ्को उपहास गदै
राष्ट्रप्रमुखहरु भोटो नजरा गरेर
फासिस्ट राजाको साँस्कृतिक शक्ति च्यूत गरेको
मनोरती पालेर बाह्र हात उफ्रँदा
निश्चय नै
शान्तिको परेवाले लुतो कन्याउँछ ।
जनताका दुस्मन,
पूर्व-तानाशाहहरुलाई प्रतिपक्ष बनाएर
सत्तासिन हुने प्रगतिवादीहरुको
निरीह मनोकांक्षाले
गैंडा र घुन एउटै देखेपछि
अमनको परेवाले फेरि लुतो कन्याउँछ ।
आफै ठूलो हुने
अर्काको तोजोलाई वध गर्ने
कुत्सीत अभिलासा पालेर
मुलुक नयाँ तुल्याउने शीर्षहरु
हिलो छ्यापाछ्याप गरेर
फोहोर खेलेपछि
लुतो कन्याउँछन् परेवाहरु ।
आफ्नो स्तुति ओकली दिएपनि
दुइ हात थापेर हसुर्ने
आलोचनालाई
प्रतिगमनको वान्ता ठान्नेहरु
काँढे साङ्लीले कित्ताकाट गरेर
कलमहरुलाई कैद गरेपछि
परेवासँगै कलमले पनि लुतो कन्याउँछन् ।
सत्ता लिप्तक मदारीहरुको राज्य-सत्ता
भागवण्डाको लुछाचुँडीमा
परेवाहरु लुतो कन्याइँरहन्छन्
गीद्धहरु शान्तिको प्रलाप छाडिरहन्छन्
हो परेवाहरु लुतो कन्याइँरहन्छन्
No comments:
Post a Comment